။။။။။။။။။။။။။။။။။။။။
အိမ်ထောင်ကွဲတာ မင်းအပြစ်မဟုတ်ဘူး။ ဒါပေမယ့် ကံတရားကို ယုံကြည်မှုလွန်ကဲပြီး ကြိုတင်ပြင်ဆင်မှုဘာမှမရှိခဲ့ရင်တော့ မင်းအပြစ်ဖြစ်သွားပြီ ...
အခုနောက်ပိုင်း ဆိုရှယ်မီဒီယာတွေကျယ်ပြန့်လာတာနဲ့အမျှ တစ်ကမ္ဘာလုံးက အသံဗလံတွေကို တစ်နေရာထဲက ကြားနိုင်လာတယ်။ ဒီလိုအသံဗလံတွေထဲမှာ ခပ်စိတ်စိတ်ကြားနေရတဲ့အသံကတော့ အိမ်ထောင်ကွဲခြင်းပါပဲ။ အမျိုးသားတွေဖောက်ပြန်ကြလို့ သို့မဟုတ် စိတ်သဘောထားခြင်း မတိုက်ဆိုင် ကြလို့ အိမ်ထောင်ကွဲကြတယ်။ ဘာကြောင့်ပဲကွဲကွဲ မိန်းမသားတွေ အနေနဲ့ နစ်နာကြရတာပဲဆိုတဲ့ ဓလေ့ထုံးစံတွေထဲက ကိုယ့်ကိုယ်ကိုယ် ရုန်းထွက်နိုင်အောင်၊ မမြင်ရတဲ့ကံကြမ္မာ အလှည့်အပြောင်းကိုကျော်ဖြတ်နိုင် အောင် ဘ၀နေထိုင်နည်းလေးတွေကို မျှဝေပေးချင်ပါတယ်နော်။
အလုပ်လုပ်ပါ …… မင်းခင်ပွန်းဘယ်လောက်ငွေရှာကောင်းပါစေ .. လူမှုအသိုင်းအ၀ိုင်းကျယ်ပြန့်ဖို့နဲ့ ကိုယ်လိုချင်တာ စိတ်ကြိုက်ဝယ်နိုင်ဖို့အတွက် အလုပ်လုပ်ပါ။ ကိုယ့်ပိုက်ဆံကိုယ်ကိုင်သုံးရတဲ့အရသာကို အပြည့်အ၀ခံစားပါ။ မင်းခင်ပွန်းကဘယ်လောက်ချစ်ချစ်နော်။ မိဘဆီကမုန့်ဖိုးလက်ဖြန့်တောင်းတုန်းကတောင် အသုံးကြမ်းလို့ အဆူ ခံဖူးကြတာပဲလေ။ တစ်ချိန်ချိန်အပြောင်းအလဲတွေနဲ့ရင်ဆိုင်ရမယ်ဆိုရင်လည်း ကိုယ့်ဘ၀ရပ်တည်ရေးအတွက် အသက်မွေးဝမ်းကျောင်းအလုပ်တစ်ခုရှိနေတာ မမှားပါဘူး။
ငွေစုပါ …… နှစ်ဦးပိုင်ငွေမဟုတ်ပဲ မင်းတစ်ယောက်တည်းနာမည်နဲ့ ငွေစုနိုင်ဖို့ ကြိုးစားပါ။ အိမ်ထောင်ရေးသာယာနေရင်တောင် မမြင်ရတဲ့ လူမှုရေးနဲ့ ကျန်းမာရေးပြဿနာတွေကိုရင်ဆိုင်ဖို့ ငွေစုထားပါ။ မင်းမိသားစုကို ထောက်ပံ့နိုင်ဖို့ ငွေစုပါ။ အနည်းဆုံးတော့ မင်း ခင်ပွန်းနဲ့ရန်ဖြစ်ရင်တောင် သွားချင်တာသွား၊ စားချင်တာ လျှောက်စားလို့ ရတာပေါ့။
အလှပြင်ပါ …… မိန်းမသားအများစုက အိမ်ထောင်ကျသွားပြီဆိုတာနဲ့ မပြင်မဆင်နေလိုက်ကြတော့တာပါပဲ။ အလှပြင်တယ်ဆိုတာ သူများတွေ ကိုယ့်ကိုကြည့်ဖို့ထက် မိမိကိုယ်ကိုယုံကြည်ချက်ရှိအောင်ပါ။ ပလာတာမကြိုက်တဲ့ နွားပဲရှိချင်ရှိမယ်။ လှတာမကြိုက်တဲ့ယောက်ျားတော့ မမွေးသေးဘူးထင်တယ်နော်။ အမြဲတမ်းလှအောင်နေတာ ကိုယ့်ဘ၀အတွက် ထိရောက်တဲ့ ဘ၀အာမခံချက် တစ်ခုပါပဲ။
မောင်နှမတွေနဲ့မကြာခဏတွေ့ဆုံပါ …… မိန်းမသားတွေက အချစ်မျက်နှာ တစ်ရွာထင်ပြီးနေလိုက်ကြတာများပါတယ်။ ဆွေမျိုးမိဘတွေအိမ်သွားလည်ပါ။ မောင်နှမတွေနဲ့မကြာခဏတွေ့ဆုံပြီး ပျော်ပျော်ရွှင်ရွှင်နေကြည့်ပါ။ ကံမကောင်းလို့ အိမ်ထောင်ရေးအဆင်မပြေတောင် မိသားစုနဲ့ မကင်းကွာခဲ့တဲ့ အတွက် မိသားစုအိမ် အချိန်မရွေ့းပြန်တက်သွားလို့ရတာပေါ့။
နောက်ဆုံးတစ်ချက်ကတော့ ကိုယ်ချင်းစာပါ …… လူတစ်ဦးနဲ့တစ်ဦးသင့်မြတ်ဖို့ ကိုယ်ချင်းစာတရားတစ်ခုပဲလိုပါတယ်။ အမေတစ်ယောက်ထဲမွေးပြီး အတူတူ ကြီးပြင်းလာတဲ့သွေးချင်းအရင်းတွေတောင် ငယ်ငယ်ကဆံပင်တွေဆွဲ ရန်ဖြစ်ခဲ့ ဖူးတာပဲ မဟုတ်လား။ မင်းရဲ့ခင်ပွန်းဟာ ပုံစံမတူတဲ့ မိခင်ကမွေးဖွားလာတာ ဆိုတာ နားလည်ပါစေ။ စိတ်သဘောထားချင်းမတိုက်ဆိုင်ကြတဲ့အခါ သူမှငါမဟုတ်ပဲဆိုတာကိုနားလည်ပြီး ကိုယ်မကြိုက်ရင်သူလည်း မကြိုက်နိုင်ဘူး ဆိုတာ ကိုယ်ချင်းစာပေးပါ။
တကယ်ဆို အိမ်ထောင်ရေးသာယာအောင်ကြိုးစားရမှာ ကျွန်မတို့တွေ အားထုတ်ရမယ့်အပိုင်းဖြစ်ပေမယ့်လည်း မင်းမှာအသက်မွေးဝမ်းကျောင်း ပညာရှိတယ်။ ငွေရှိပြီးအလှတရားတွေရှိတယ်။ မိသားစုရှိတယ်။ တစ်ချို့ အရာတွေမှာ ဆုပ်ကိုင်ထားရတာ အရမ်း ပင်ပန်း ခက်ခဲလာတဲ့အခါ လွှတ်ချ တတ်ပါစေ။ ပတ်ဝန်းကျင်က ပြောဆိုကြတဲ့ စကားသံတွေကြားက ခွဲထွက်လိုက် ပါ။ မင်းအတွက် ဘေးထွက် ဆိုးကျိုးပေးနေပြီဆိုရင်တော့ ကြိတ်မှိတ်သည်းခံ ငိုကြွေးမနေ ပါနဲ့တော့။ ကိုယ့်ကိုယ်ကိုယုံကြည်မှုရှိပြီး ထက်မြတ်တဲ့ မိန်းမသား တစ်ဦးအတွက် ယောက်ျားတစ်ဦးဆိုတာ ချစ်ခြင်းမေတ္တာထားဖို့အပြင် ဘာ အပေးအယူမှ မရှိပါဘူး။ ဒါ့ကြောင့်ပြောတာပေါ့ ...
“အိမ်ထောင်ကွဲတာ မင်းအပြစ်မဟုတ်ဘူး။ ဒါပေမယ့် ကံတရားကို ယုံကြည်မှုလွန်ကဲပြီး ပြင်ဆင်မှုဘာမှမရှိခဲ့ရင်တော့ မင်းအပြစ်ဖြစ်သွားပြီ” လို့ ..
No comments:
Post a Comment